شهدت إيرادات السينما المصرية في أول موسم حقيقي ليها بعد ثورة 25 يناير مفاجأة من العيار التقيل؛ وأكدت أن ذوق الجمهور مش هيتغير.وتصدر قايمة الإيرادات أول أيام العيد فيلم” شارع الهرم” بطولة سعد الصغير، ودينا، وحقق في أول أيامه إيرادات وصلت لـ مليون و700 ألف جنيه، في المرتبة التانية فيلم “تك تك بوم” لمحمد سعد، وحقق مليون و200 ألف جنيه.
وسجلت باقى الأفلام هبوط في أول أيام عرضها وما حققش فيلم “بيبو وبشير” بطولة آسر ياسين ومنة شلبي أكتر من 300 ألف جنيه، عكس اللى كان متوقع من فيلم بيقوم ببطولته آسر ياسين، وهو واحد من الفنانين اللى ارتبط اسمهم بثورة 25 يناير، ومنة شلبي صاحبة الجماهيرية بين جمهور الشباب، وكنتيجة متوقعة حقق فيلم “يا أنا يا هو” 200 ألف جنيه، اما فيلم “أنا بضيع يا وديع” إيراداته وصلت لـ 100 ألف بس.
وعلق الكاتب وحيد حامد على نتيجة الايرادات وقال: جمهور العيد مش مقياس لنجاح الأفلام، والإقبال على فيلم معين في العيد مش دليل على نجاحه أو قيمته الفنية، لكنه بيدل على أنه مناسب لجو الفسحة في العيد، ولازم نستبعد جمهور العيد من أي تقييم للأفلام.
