القلم السحرى قلم انتشر الفترة الاخيرة لقوتة السحرية على ازالة الخدوش واخفاءها وطبعا فى الى مصدق وفى الى مش مصدق وفى الى مش مقتنع او عايز يشوف حد جربه وطلع حقيقى وانا من الناس دى الى عايز اشوف حد جربه
لان واحد ابن حلال خربش عندى الكبوت من ادام تقريبا كان بيجرب يمضى وجربت اعملها بالبوليش لكن معملش حاجه لان الدهان طلع لان الخربوش باداة حاده مفتاح او مسمار فقولت اشوف القلم السحرى ودورت ولقيت التجربه دى واقتنعت بيها ولو حد جربه ياريت يفدنا ويقولنا نتيجه تجربته
إليكم نتيجة التجربة ..
بعد أن قرأت عن القلم السحرى هنا ، كان ليا صديق نازل من أمريكا اليومين اللى فاتوا ، فقلت له عليه ، وجابه ، بس هو اعتبره هدية ورفض ياخد تمنه علشان كده ما عرفتش هو اشتراه بكام بالظبط .. و ده شكل العبوة :
والقلم زى ما انتم شايفين عامل زى القلم الفلوماستر بس سنه زي ما تقولوا كده خشب أو فيبر بنى ومعاه سن احتياطى علشان لو اللى فيه نشف ويمكن استبدال السن بسحبه ببساطة .. ويتم تنشيط القلم بالضغط بالسن على منديل ورق كذا مرة ، وهو فيه سوستة بحيث تلاقيه بياخد ويدى معاك (زي بلية القلم الكوركتور كده) ، وبعد كام مرة هتلاقى السن تشبع بالمادة السحرية وهى مادة شفافة.
والاستخدام يكون بتنظيف مكان الخدوش جيدا ، والاستخدام يكون فى مكان ظليل تماماً لأنه على حسب ما هو مكتوب سريع الجفاف فى الشمس ..
وأنا كان عندى عدة خدوش فى العربية ، واللى كان مضايقنى جداً هى خدوش على كبوت العربية عملها حد ابن حلال بمسمار أو حاجة حادة وييجوا كده عشرة خدوش جنب بعض بطول حوالى 15 سم ودى صورتهم قبل العلاج .
وبعد المرور على الخدوش بالقلم تغطيها المادة الشفافة ، وتفاجأ بأن الخدوش قد اختفت ، وينتابك قدر كبير من السعادة وانت شغال .. (لا حظ ان كل ده وانت شغال) ..
بتسيب العربية ساعتين تلاتة كده ، أو تعرضها للشمس ، وبعد كده بتلاقى ان مكان العلاج نشف وممكن يلقط ذرات تراب من الجو ، بنمسحه بفوطة ناعمة ، وبتكون النتيجة كده :
ودى صورة تانية :
وكما تلاحظون فالخدوش قد تحسنت ، يعنى أوصف لكم ايه اللى حصل .. الخدوش كانت واضحة بيضاء ، يعنى باين تحتها المعجون، وكنت تمشى عليها بضافرك تحس انها واخدة عمق، بعد الاصلاح بالقلم، لما تمر على الخدش بضافرك تحس انه اتملا ، كما انه بياخد لون العربية ، بس زى ما انتم شايفين مازال مكانها واضحاً ، يعنى كأنك جبت قلم دوكو بلون قريب من لون العربية (حتى مش لونها بالظبط) ومشيت عليه بالخدوش.
والحقيقة كنت متوقع ألاقى نتيجة أحسن من كده ..
الخلاصة : درجة رضايا عن هذا المنتج هى 40% فقط
ولا أنصح حد انه يشتريه إلا اذا عدل توقعاته بخصوص النتائج اللى مش هتكون مبهرة.
لو عاد بى الزمن كنت هاجيبه برضه ، لأنه جاى لى هدية ومادفعتش فيه فلوس
باقى ملاحظة ، بالنسبة للخدوش الخفيفة خالص يعنى زى اللى بتحصل مثلاً من مسح العربية بفوطة زفرة بها ذرات تراب ، فالنتيجة معها أحسن بكثير من الخدوش الواضحة ، بس دى حاجات ميكروسكوبية فمستحيل أعرف أصورها ولا قبل ولا بعد.
